enlace | Sámegielat Mumenvággi álgá 13.4.2020 – jietnaneavttárin ee. Mikkel Gaup, Áilu Valle ja Siri Broch Johansen

Moominvalley is now also in Northern Sami. The first season of Mumenvággi starts to air on Yle's channels on April 13, 2020.

Yle stuorra buvttadeapmi Mumenvággi lea oaidninláhkai 13.4. rájes maid davvisámegillii. Mumenvákki vuosttas badji álgá Yle TV2:žis ja Yle Areenas vuossárgga 13.4.

Mumenvákki jietnaneavttárin leat dovddus namat Suomas ja Norggas. Mumenstálu rollii njuikesta ráp-artista Áilu Valle.

"Lea dehálaš kulturdahku oažžut Mumenvággi-ráiddu fállun sámemánáide sin iežaset eatnigillii, dál vuos davvisámegillii ja maŋŋelis eará sámegielaide. Juohkehaš ráhkista ja sáhttá dovdat iežas dain figuvrrain ja ná buot ahkásaččaide dehálaš fáttát šaddet lagažin.” – Áilu Valle

Mumenáhččái jienas luoiká Norgga beale neavttár Mikkel Gaup, gii lea dovddus ee. ealligovain Breaking the Waves ja Ofelaš. Mumeneatni fas neaktá Norgga beale girječálli ja -neavttár Siri Broch Johansen.

“Lean ilus go lean ožžon addit jiena ja eallima davvisámegielat Mumenvággái. Dalle go nieidan lei uhcci, mii láviimet geahččat NRK Sámi Mumenráiddu. Mumeneatnis lei nu litna jietna, álot liekkus ja jeđđejeaddji. Lea hui somá, ahte beasan neaktit justa su.” – Siri Broch Johansen

"Mumenat iežas eatnigillii"

Mumrihkkan gullat musihkkár Niko Valkeapää. Journalista ja badjeolmmoš Aslak Paltto lea Snuoggi. Unna Junnás oahpes neavttár Irene Länsman addá jienas Unna Miážii:

"Nu guhká go muittán, de mumenat leat álot leamašan. Mun gehččen mánnán ruoŧagielat mumeniid, ja mu máná guovttos geahčaiga suomagielat mumeniid. Boahtte áiggis mu áhkkubat gehččet mumeniid sámegillii, dat lea máilmme somá. In livčče goassige mánnán, dahje ollesolmmožinge, máhttán jurddašit, ahte muhtimin šaddá dat beaivi go mumenat hállet sámegiela.”

“Bivnnuhis prográmmat iežas gillii movttiidahttet mánáid hállat sin eatnigiela. Šaddá dovdu, ahte viimman mun dohkken dákkárin go lean ja sáhtán leat das rámis.” – Irene Länsman

Snuhrrenieidda rollas lea ee. Yle Sámi Sohkaršohkka-prográmma oahpes journalista Linda Tammela.

“Lei somá hilbošit ja čiŋadit Snuhrrenieidda juolgečikŋii ja geahččat máilmmi čuvgesrukses lásaid čađa! Ledjen nu rámis, go mu válljejedje rollii ja mus lea vejolašvuohta ovddidit ná fiinna ášši. Dál unna ristnieiddažan beassá rávásmit Mumeniiguin, geat hállet su eatnigiela ja das lean gal hui lihkolaš.” – Linda Tammela

Mumenvággi dahkkojuvvo maid anáraš- ja nuortalašgillii

Vuosttas bajis eará rollain leat: Annukka Hirvasvuopio-Laiti (Mimmel), Anna Näkkäläjärvi-Länsman (Filijoŋká), Pentti Pieski (Bisamroahttu), Tuomo Huusko (Hemul), Anne Olli (Du-dikki), Suvi West (Emmá Teáhterroahttu), Inga Ravna-Pieski (Ninni), Aslak Paltto (Miská) ja Inger-Mari Aikio (Boles, Hemul-siessá), Pekka Aikio (Di-di-uu, Unna Gopmáš).

Davvisámegillii Mumenvággi-ráiddu lea jorgalan Inger-Mari Aikio. Ráiddu lea bagadallan Susa Saukko. Neavttáriid skuvlemis lemaš mielde maiddái bagadalli Pauliina Feodoroff.

Giđdat 2020 Yle kanálain čájehuvvojit Mumenvákki vuosttas baji 13 oasi. Maid ráiddu nubbi badji, mii dál lea oaidninláhkai suoma- ja ruoŧagillii Yle kanálain, dubbejuvvo sámegillii. Dalle dubbengiellan leat anáraš- ja nuortalašgiella.

Mumenvákki vuosttas bajis beassá oahpásnuvvat Mumenvákki oahpes ássiide ja lagašmeahci vehá apmasut figuvrraide. Muitalus láidesta geahčči čađa molsašuddi jagiáiggiid gitta ođđa dálvái. Dalle Mumenstállu lea fas ovtta jagi boarrásut – ja son lea veháš iehčanabbo, sihkkarabbo ja ovtta lávkki lagabus dan Mumena, manin son háliida šaddat. Ráiddu lea buvttadan suopmelaš Gutsy Animations.

Mumenvággi Yle TV2:žis ja Yle Areenas 13.4. rájes vuossárggaid diibmu 8.25.